Magapanghatag sang libre nga tubig ang Flowater Resources Iloilo Inc. bilang sabat sa ginabakho sang mga pumuluyo sa mga lugar nga apektado sang temporaryo nga pagpauntat sang pag-supply sang tubig sang bulk water supplier sa tubo sang MIWD.
Ini kasunod sang pagpamalibad sang MIWD nga tungdan ang responsibilidad nga bayaran ang P1.6M nga balor sang tubig nga gin-supply sang Flowater sa sulod sang walo ka adlaw.
Sa interview sang Bombo Radyo Iloilo kay Bombo Warren French, Area Manager for Bombo Visayas,iya ginpahayag nga bilang pagsabat sa pagkinahanglan sang mga pumuluyo,gin-instruct ni Dr. Rogelio Florete Sr., Chairman sang Florete Group of Companies ang nasambit nga tikang sang Flowater.
Suno kay Bombo Warren French, ini ang bukas sa tanan nga mga barangay nga sakop sang service area sang Flowater kaangay sang banwa sang Pototan, Zarraga, Leganes kag Syudad sang Iloilo.
Lakip sa mga dapat nga obrahon kag tandaan agud makakuha sang libre nga tubig amo ang mga masunod:
1.Nagakadapat nga ang mga punong barangay ukon ang mga pumuluyo ang personal nga magpadulong sa opisina sang Flowater nga nahamtang sa R. Florete Building sa corner Rizal-Iznart Street Iloilo City ukon sa atubang sang Iloilo Central Market sa may Maria Claria.
2.Nagakadapat nga mag fill -up sang mga impormasyon nga kinahanglan sang water availment agud mahatagan sang claim stub para makakuha sang tubig nga ilimnon sa natalana nga adlaw.
3.Nagakadapat nga dal-on ang claim stub kag water tanker sa planta sang Flowater nga nahamtang sa Brgy. Nanga Pototan Iloilo.
4.Ang mga pumuluyo man ang dapat mangita sang ila kaugalingon nga water tanker.
Sa mga luyag nga magpamangkot sa libre nga tubig sang Flowater, mahimo magtawag sa telephone number nga 333-42-33.
Ang Flowater Resources Iloilo Incorporated ang sister company sang Bombo Radyo Philippines kag myembro sang Florete Group of Companies.
