Ginpahayag sang Philippine National Police nga makabig na nga fugitives sanday former Bureau of Corrections (BuCor) Chief Gerald Bantag kag former Deputy Officer Ricardo Zulueta bangud sang warrants of arrest nga gindagdag batok sa ila.
Suno kay PNP Public Information Office chief Police Colonel Redrico Maranan, padayon pa nga ginapangita sang otoridad sanday Bantag kag Zulueta kasunod sang pag-isyu sang korte sang warrants of arrest.
Matandaan nga Byernes sang ginpaguwa sang Regional Trial Courts sang Las Piñas kag Muntinlupa ang warrants kaangot sa kamatayon sang broadcaster nga si Percy Lapid kag ang ginalantaw nga middleman sa amo nga krimen nga si Jun Villamor.
Suno pa sa PNP, padayon ang manhunt operations sa Bulacan kag Caloocan para sa duha.
Pareho nga na-indict sanday Bantag kag Zulueta sang nagligad nga bulan sa duha ka counts sang murder kasunod sang kamatayon nanday Lapid kag Villamor.
Matandaan nga Oktubre 3,2022 sang ginluthang patay si Lapid sa Las Piñas samtang si Villamor naman ang ginpatay sa sulod sang New Bilibid Prison sang Oktubre 18, 2022.
Una na nga ginpahayag ni Bantag nga wala sang kamatuoran ini nga mga alegasyon kag lunsay lamang “fabricated”.
