ILOILO CITY- Nagapati si anay City Councilor Plaridel Nava nga ang International Builders Corporation ang sa likod sang Monolithic Construction & Concrete Products, Inc.
Ang International Builders Corporation ang kontraktor sang P680 million nga Ungka Flyover samtang ang Monolithic Construction naman ang nakakuha sang kontrata nga balor P100-million para sa rectification sang flyover.
Sa interview sang Bombo Radyo kay Nava, iya ginpahayag nga nagasuspetsa ini nga ginhulam lang sang International Builders Corporation ang lisensya sang Monolithic Construction agud sila sa gihapon ang magpatigayon sang proyekto.
Suno kay Nava, ebidensya na lang ang iya ginatipon kag kun mapamatud-an niya nga may natabo nga hocus- pocus sa pag-award sang kontrata, pasakaan niya ini sang kaso.
Matandaan nga sang Hunyo 2023, una nagpasaka si Nava sang criminal complaints sa Ombudsman angot sa ginaalegar violation sang Section 3 sang Republic Act 3019 ukon Anti-Graft and Corrupt Practices Act batok sa International Builders Corporation kag sa Department of Public Works and Highways Region 6.
Dugang pa ni Nava, bangud nga indi makaubra ang International Builders Corporation kasunod sang ginpangatubang nila nga kaso, gin-gamit nila ang Monolithic Construction bilang dummy agud makapadayon sila sa gihapon sa ila pagpangontrata sang proyekto.
Nagpabutyag naman si Nava sang pagkadismaya sa Ombudsman bangud tubtub subong, wala pa sang update sa kaso nga iya ginpasaka.
