Nagpanumpa na kahapon nga adlaw si anay PNP chief Nicolas Torre III bilang bag-o nga general manager sang Metropolitan Manila Development Authority (MMDA).
Gintal-usan sini si Procopio Lipana sa posisyon.
Suno kay Interior Secretary nga si Jonvic Remulla, ginakonsiderar nila ini nga mandatory retirement para kay Torre sa Philippine National Police.
Nahibaluan nga na-relieve si Torre bilang PNP chief sang Agosto 25 kag ginbuslan ini ni Police Lieutenant General Jose Melencio Nartatez Jr.
Isa sa mga rason sang iya pagka-relieve amo ang indi sini pag-ugyon sa sugo sang National Police Commission (NAPOLCOM) bahin sa reassignment sang ila nga key officials.
Bilang anay isa ka CIDG chief, ginpangunahan ni Torre ang pag-aresto kay anay Presidente Rodrigo Duterte kag sa iya spiritual adviser nga si televangelist Apollo Quiboloy.
Gindala si Duterte sa International Criminal Court sa Netherlands kag gin-akusahan sang human rights violation.
Sang si Torre pa ang regional police chief sa Davao, ginpangunahan man sini ang operasyon batok kay Quiboloy sa Kingdom of Jesus Christ compound matapos ang 16-ka-adlaw sini nga standoff.
Sa karon, si Nartatez na ang nagaserbe nga “acting chief” sang PNP.
