Gin-athag ni Deputy Speaker kag Spokesperson sang Prosecution Team nga si Rep. Janette Garin nga ang desisyon sang prosekusyon nga magbuhin sang mga witness para sa Article 4 sa Articles of Impeachment batok kay VP Sara Duterte ang wala nagakahulugan nga nangin maluya ang kaso sang Bise Presidente.
Sa interview sang Bombo Radyo kay Garin, iya ginpahayag nga indi na kinahanglan ang dugang nga mga testigo bangud “well-established” na ang kaso.
Ini bangud man sa mga nangin testimonya sang tatlo ka mga witness nga sanday NBI Regional Director Jeremy Lotoc, NBI Agent John Mark Calilung, kag NBI Director Melvin Matibag.
Suno kay Garin, wala na sang dugang nga balor ang iban pa nga mga witness bangud maathag kag klaro na ang mga ebidensya nga ginpresentar sa mga nahauna nga mga inadlaw sang trial.
Ginpakita man ang mga dokumento kag video evidence paagi sa mga testigo, kag wala ini ginpamatukan ukon gindeny sang depensa sa baylo nagapangita sila sang mga nagkalain-lain nga ideas agud makalusot sa sala nga ginbuhat ni VP Sara Duterte.
Pahayag pa ni Garin nga ang ginbuhat ni Duterte nga pagpamahog wala nagakaangay sa iya posisyon bilang ikaduha sa pinakamataas nga nagapungko sa pwesto sa gobyerno.
Dugang pa sini nga may ara pa sang tatlo ka impeachment complaints nga kinahanglan preparahan kun sa diin kinahanglan nila nga magpokus sa prosecution.
