ILOILO CITY – Tatlo ka tuig pa ang hulaton antes mangin available ang kontrobersyal nga golden rice sa pungsod.
Ini ang ginpahayag sang Philippine Rice Research Institute kadungan sang online celebration sang 16th National Biotechnology Week.
Suno kay Philippine Rice Research Institute senior science research specialist Reynante Ordonio, ang Golden rice ang ginalauman nga mangin commercially available sa 2023.
Matandaan nga Disyembre sang nagligad nga tuig sang gin-aprubahan bilang pagkaon sa Pilipinas ang Golden rice.
Ang masunod nga proseso suno kay Ordonio amo ang varietal registration sa diin ang mga binhi ang i-propagate para sufficient testing kag survey sa mga probinsya sa diin itanom ang Golden rice.
Magapatigayon man ang PhilRice sang pilot social deployment sa mga probinsya nga ginalakipan sang Quirino, Catanduanes, Samar, kag madamo pa.
