Ginkumpirma sang Bangko Sentral ng Pilipinas ang pagdasig sang inflation ukon pagtaas sang presyo sang mga produkto, goods kag services subong nga bulan sang Nobyembre.
Suno kay Bangko Sentral ng Pilipinas Governor Benjamin Diokno, ang consumer price index ang nagdangat sa 3.3 percent nga pinakamataas nga inflation humalin sang Pebrero 2019.
Isa sa mga ginatudlo nga rason sang inflation amo ang paglaslas sang mga bagyo sa pungsod.
Ang nasambit nga numero ang mas mataas sa 2.4 tubtub 3.2 percent range forecast sang Department of Economic Research sang Bangko Sentral ng Pilipinas.
Ang pagkaon kag non-alcoholic beverages ang nagdoble subong nga Nobyembre kun ipaanggid sang Oktubre.
Nahibauan nga ang inflation humalin sang Enero ang naga-average lang sa 2.6 percent.
