Gina-engganyo ni Iloilo Governor Arthur Defensor Jr. ang mga ginikanan nga indi magkatahap sa pagpabakuna sang ila nga mga kabataan batok sa measles-rubella.
Suno kay Defensor, importante ang vaccination bilang frontline strategy sa paglikaw sa mga balatian.
Nagpangabay man ini sa publiko nga indi pagpakalainon ang bakuna, bangud makabulig ini sa pagprotektar sa mga kabataan kag komunidad batok sa balatian.
Pahayag pa sini nga kun ang isa ka bakuna aprobado sang gobyerno kag ginagamit na sa madamo nga bahin sang kalibutan, masaligan ini bilang kabahin sang preventive healthcare.
Apisar sini, gin-ako ni Defensor nga may mga concern sa pagpatuman sang vaccination program, ilabi na sa target nga ginabase sa projection kag indi sa actual nga populasyon sang isa ka lugar.
Ginpahayag niya nga ini nga concern iya na ginpabalo sa national government matapos ini maistoryahan sa League of Provinces.
Gindumdom man niya ang tion sang COVID-19 pandemic, kon sa diin nagpabakuna siya kag ginpakita sa publiko ang iya pagsuporta sa vaccination.
Apang, gin-athag niya nga indi niya ini mahimo sa subong para sa Measles-Rubella vaccine bangud ini nga bakuna para sa mga kabataan.
