GUIMARAS – Ginakinahanglan sang probinsya sang Guimaras ang pagbinuligay sang mga opisyal.
Ini ang pahayag ni Guimaras Governor Samuel Gumarin kay Buenavista, Guimaras Mayor Eugene Reyes.
Sa interview sang Bombo Radyo kay Gumarin, iya ginpahayag nga wala sang pagbinuligay sa tunga sang mga opisyal sang Buenavista kag Guimaras Provincial Government agud masolbar ang problema sa Buenavista Emergency Hospital sa diin wala nakolekta ang mga basura gikan sa nasambit nga hospital.
Suno kay Gumarin, wala siya nagapalagyo sa responsibilidad bangud ini ang ginadumala sa idalom sang Guimaras Provincial Government apang ginalauman man niya ang bulig sang Local Government Unit sang Buenavista.
Suno kay Gumarin, kalabanan sa mga naga-trabaho kag mga pasyente sa nasambit nga hospital ang gikan sa nasambit nga banwa.
Bilang gobernador kag isa man ka doktor, masakit para sa iya ang mga akusasyon apang nagapati siya nga kun indi niya ini matungdan bilang doktor, ano pa gid ayhan ang mga wala sang hinalung-ong sa nasambit nga propesyon.
Ginapanginwala man ni Gumarin ang ginapahayag “pagpato-pato” ni Reyes nga siya ang yara sa likod sang mga pamahog sa iya sa social media, sa diin suno sa gobernador, ginkabig niya bilang suod nga abyan sa politika si Reyes.
Ginkwestiyon man ni Gumarin kun nga-a ginpadaku ang isyu sa hospital samtang wala man gani ginsapak sang napatay ang isa ka job hire sang Buenavista kadungan sang pagpatigayon sang road clearing operation.
Kaangot sa posible kaangtanan sang away sa isyu sang pag-demote ni Gumarin sa tiayon ni Reyes nga nagatrabaho sa Buenavista Emergency Hospital, gin-athag ni Gumarin nga ini ang pagbawi kag pagbalik sa posisyon sa nauna nga head nurse sang hospital kag bangud nagapati siya nga indi pa kwalipikado ang tiayon ni Reyes sa nasambit nga posisyon.
