Aprubado na sa Kamara ang hagna nga ginduso agud mahatagan sang P1 million nga cash gift ang mga Filipinos nga makadangat sa 101 anyos.
Pasado ini nga House Bill 7535 sa third and final reading matapos nakakuha sang 257 ka yes votes.
Ini nga hagna ang nagatuyo nga amyendaran ang Centenarians Act of 2016 kun sa diin nakasaad nga P100,000 lamang ang cash gift sa Filipinos nga makalab-ot sa ika-100 nga kaadlawan.
Sa sini nga hagna, yara gihapon ang P100,000 nga cash gift sa Filipino nga makalab-ot sa 100-anyos, apang may P25,000 nga cash grant man sa makalab-ot sa 80, 85, 90 kag 95 anyos ang edad.
Ginaduso nga ang funding requirement ang kuhaon sa idalom sang tuigan nga General Appropriations Act.
Sa amo nga hagna, katungdanan sang National Commission of Senior Citizens nga ipatuman ang amo nga tikang.
Kun madumduman, sa House committee hearing sang nagligad nga tuig, ginpahayag ni former Department of Social Welfare and Development Sec. Erwin Tulfo nga may yara sang 662 ka Filipino centenarians sa pungsod.
Natalana nga isumite sang Kamara ang hagna sa Senado para sa dugang nga tikang. #
