Gindeklara nga dead-on-arrival ang Filipino-Pakistani matapos ginluthang sa Fort San Pedro, Iloilo City Proper.
Ang biktima amo si Hamza Pechon Kayani, 31 anyos kag taga West Timawa, Molo, Iloilo City base sa nasaad sa iya nga identification card.
Sa interview sang Bombo Radyo kay Police Staff Sergeant Neil Eric Goniabo, imbestigador sang Police Station Number 1, iya ginpahayag nga base sa panaysayon sang duha ka mga menor de edad nga upod sang biktima, may yara sang motorsiklo nga nagpondo sa likod sang salakyan ni Kayani.
Nagpanaog ang backrider, ginpalapitan ang biktima kag gintiro.
Suno kay Goniabo, yara lang sa guwa sang salakyan si Kayani upod ang menor de edad nga babaye samtang nagapahangin-hangin.
Ang backrider suno sa mga menor de edad ang nakasuksok sang rain coat.
Ginapahayag nga may yara man sang stab wound ang biktima.
Na-recover sa lugar ang duha ka fired bullets, apat ka mga fired cartridge cases apang wala pa sang ihibalo ang pulis kun ano nga armas ang gingamit sa pagpangluthang.
Nahibaluan nga si Kayani ang ginserbehan sang search warrant sang 2018 sa diin na-recover sa iya balay sa Tanza Esperanza, City Proper 16 ka sachet sang shabu, drug paraphernalia, mga bala sang .45 caliber pistol, duha ka magazine sang m16 rifle kag granada.
Si Kayani ang anay nagapangatubang sang kaso nga murder kag pagpatay sa isa ka real estate consultant sa compound sang The Q drive-in motel sa La Paz, Iloilo City.
