Daw wala sang pagtigulang ang football superstar nga si Lionel Messi sang naka-hat trick ini sa hampang sang Argentina batok sa Bolivia sa 2026 World Cup qualifier.
Ang tatlo ka goals ni Messi amo ang naghakwat sa team nga makuha ang 6-0 nga kadalag-an batok sa central South American team.
Ini na ang ika-10 nga international hat-trick ni Messi nga patas na sa record sang iya long-time rival nga si Cristiano Ronaldo sang Portugal.
Magluwas sa hat trick, si Messi man ang naghatag sang duha ka assists kanday Lautaro Martinez kag Julian Alvarez nga pareho man niya nga kaupod sang nagkampyon sa 2022 World Cup.
Ang isa pa nga naka-skor sa team amo si Thiago Almada sa ika-69 nga minuto.
Ini ang ikaduha nga hampang sang eight-time Balon d’Or winner para sa Argentina halin sang Hulyo sang nagsuprer ini sang ankle injury.
Ang Argentina national football team ukon La Albiceleste ang nagtapos sa draw batok sa Venezuela sang nagligad nga semana, nalutos batok sa Colombia sang Septyembre, apang nagapanguna gihapon sa CONMEBOL World Cup qualifying table nga may 22 points.
Sunod nga atubangon sang squad ang Paraguay sa masunod nga qualifier game nga naka-schedule sa Nobyembre 14.
