Patigayunon na sa Huwebes, Hunyo 13, 2019 ang hearing para sa issuance of writ of possession sang MORE Electric and Power Corporation (More Power) sa tanan nga propedad sang Panay Electric Company (PECO).
Sa interview sang Bombo Radyo Iloilo kay Atty. Hector Teodosio, legal counsel sang MORE Power, iya ginpahayag nga sa nasambit nga hearing sa Regional Trial Court (Branch 37), ipresentar sang MORE Power ang mga ebidensiya kag mga dokumento agud kumbinsihon ang korte nga entitled ang iya kliyente para sa nasambit nga writ of possession.
Suno kay Atty. Teodosio, magapresentar man sila sang tatlo ka mga testigo.
Samtang, ginpahayag man sang natungdan nga pagkatapos sang hearing sa Hunyo 13, ang masunod nga mga hearing ang maga-sentro na sa pinal nga pagtumod sang kompensasyon sa PECO para sa ila propedad.
Nahibaluan nga ang pairing judge sang RTC Branch 37 nga si Judge Victor Gelvezon, ang maga- preside sang hearing bangud si Judge Marie Yvette Go nga amo ang nag-set sang petsa sang hearing ang yara pa sa study leave.
Ang MORE Power, bilang bag-o nga electric power distributor sa syudad sang Iloilo ang nagatuyo nga i- take over ang serviceable power distribution assets sang PECO nga ang franchise nag- expire na sang nagligad pa nga Enero 19, 2019.
Apang ginhatagan sang Energy Regulatory Commission (ERC) ang PECO sang 2-year provisional permit agud nga makapadayon sa pag-operate gamit ang provisional Certificate of Public Convenience and Necessity (CPCN).
