Naga-preparar ang United Kingdom pananglitan maglab-ot na sa 41 degrees celcius ukon 106 degrees fahrenheit ang temperatura subong nga semana — ang ginalantaw nga mangin pinakamainit nga adlaw sa maragtas sang pungsod.
Una na nga nag-isyu ang Meteorological Office sang red extreme heat warning sa England — halin sa London kag sa South East tubtub sa York kag Manchester.
Ini ang labing-una nga tion nga nag-isyu ang Met Office sang red warning halin sang gintukod ang weather system sang nagligad nga tuig.
Ang pinakamataas nga temperatura nga na-rekord sa UK amo ang 38.7C nga natabo sa Cambridge sang 2019.
Suno kay Bombo International Correspondent Ramil Isogon direkta sa Nottingham, sini lang nga Lunes, nagsobra na sa 37 degrees Celcius ang temperatura sa London, Cambridge, Surrey kag Suffolk.
May amber warnings naman nga gin-isyu sa England kag Wales kag sa pila ka bahin sang Scotland.
Ang amber warning nagakahulugan nga posible ang health problems; kinahanglan ang substantial changes sa trabaho kag adlaw-adlaw nga hilimuon; posible matabo ang mga insidente sa tubig bangud masami nagakadto ang mga tawo sa baybay kag mga suba; kag posible man ang delay sa byahe.
Sa forecast sang Met Office, posible magdangat sa 41degrees sa Worksop, Nottinghamshire buwas sa hapon, oras sa UK.
