Nagapahanumdom ang Philippine Atmospheric, Geophysical and Astronomical Services Administration (PAGASA) sa publiko nga indi mag-hoard ukon magtipon sang sobra nga bottled water bangud sa ginapaabot nga malawig nga El Niño.
Suno sa PAGASA, kinahanglan nga magtipid sa tubig bangud mahimo magdugay ang tig-ilinit tubtob Marso ukon Hunyo sa masunod nga tuig, apang, ginabisuhan ang publiko nga likawan ang sobra nga pagtipon ukon pag-hoard sang bottled water agud indi maapektuhan ang suplay sang tubig.
Samtang, nagpasalig man sang Department of Trade and Industry (DTI) nga igo pa ang suplay sang bottled water sa mga grocery stores kag padayon nila nga gina-monitor ang presyo sang tubig, plastic drums kag iban pa nga water containers.
Pahayag pa sang PAGASA, ang El Niño nagakatabo kon mas mataas sa normal ang temperatura sang dagat kag kasagarang nagadala sang mas manubo nga ulan.
Ginapaabot man nga mga 40 ka probinsya ang maka-eksperyensya sang kulang nga ulan, kag mahimo ini maglapta sa 80 ka probinsya pagsulod sang Enero 2027.
Dugang pa, bilang preparasyon sa malawig nga tig-ilinit, ginarekomendar ang pagtanom sang mga drought-resistant crops ukon mga tanom nga indi masyado nagakinahanglan sang tubig.
