Sa baylo nga mga dumuluong kag mga tumuluo ang magapuno sa Jerusalem subong nga Semana Santa, nangibabaw ang kahadlok kag kahangawa sang kadam-an bangud sang nagapadayon nga giyera sa Middle East.
Sirado ang kadam-an sa mga simbahan, holy sites, kag mangin ang mga balaligyaan bangud wala sang mga turista nga nagaabot. Hugot man ang ginpatuman nga security restrictions.
Sa kinaandan, sang nagligad nga mga tinuig, linibo nga mga Katoliko ang nagapili sang Jerusalem nga ila kadtuan para sa pilgrimage, Stations of the Cross, kag para magbisita sa Church of the Holy Sepulchre.
Ginadugukan man anay ang Via Dolorosa ukon ang makitid nga alagyan nga ginapatihan gin-agyan ni Hesus antes ini ginpatay kag ginlansang sa Krus.
DAYON ANG MGA AKTIBIDAD SA HOLY SEPULCHRE
Sa press release sang Vatican, ginpagwa ang joint statement sang Latin Patriarchate of Jerusalem kag Custody of the Holy Land.
Diri ginkumpirma nga ang tanan nga aktibidad kaangot sa Semana Santa kag Easter sa Church of the Holy Sepulchre ang na-address na kag na-resolba nga may koordinasyon sa mga awtoridad.
“In agreement with the Israeli Police, access for representatives of the Churches has been secured in order to conduct the liturgies and ceremonies and to preserve the ancient Easter traditions at the Church of the Holy Sepulchre,” kabahin sang statement.
Matandaan nga sang Domingo de Ramos, ginbalabagan sang Israeli Police ang Latin Patriarch of Jerusalem nga si Cardinal Pierbattista Pizzaballa kag Fr Francesco Ielpo, Custos of the Holy Land, samtang yara sa gwa sang simbahan antes maghiwat sang misa sa pagmarka sang pagsugod sang Semana Santa.
Nagpahayag ang opisina ni Cardinal Pizzaballa nga ini ang una nga tion sa madamo nga mga siglo nga wala ginpasulod ang Latin Patriarch sa holy site sa mismo Palm Sunday.
MAHIMO MA-STREAM ANG MGA AKTIBIDAD
Sa joint statement, ginpahayag man nga bangud sang nagapadayon nga gyera sa Middle East, madamo gihapon sang pagpanghugot sa public gatherings.
Bangud sini, naghatag ang Simbahan sang live streaming sang liturgies and prayers para nga makaupod gihapon ang mga tumuluo sa Holy Land kag sa kalibutan nga espiritwal nga mga hilikuton.#
