Nagapadayon ang hot pursuit operation sang mga kapulisan sa suspek sa ginaalegar nga hostage-taking sa Barangay Gemat-y, Passi City.
Ang suspek ang ginkilala kay alyas “Lester”.
Una nga gin-report nga natabo ang hostagetaking sa barangay Cadilang apang gin-athag ni Gemat-y Punong Barangay Jose Leo Peñaflorida nga sa iya mismo barangay natabo ang insidente.
Suno sa Punong Barangay, ang ginaalegar nga gin-hostage amo ang apo kag lola sang suspek.
Pahayag niya, mga las 8 pa sang nagsugod ang hostagetaking.
Ang suspek amo man ang amay sang bata kag ginapahayag nga may long firearm ini.
Samtang, ginsiling man ni Peñaflorida nga indi luyag sang suspek nga tawgon nga “hostagetaking” ang natabo, kag antes pa man ang insidente, nag-inom pa ini sang makahulubog nga ilimnon.
Ginalantaw sang mga otoridad nga ang impluwensya sang alkohol ang isa sa mga posible nga rason sang iya ginhimo.
