IGBARAS, ILOILO – Kapin sa 20 minutos ang pagbayluhanay sang lupok sang Philippine Army kag sang ginapatihan New People’s Army sa boundary sang Sitio Tigbanaba kag Sitio Maje sa Brgy. Curocuan, Igbaras, Iloilo.
Sa interview sang Bombo Radyo kay Major Cenon Pancito III, tagpamaba sang 3rd Infantry Division sang Philippine Army, iya ginpahayag nga wala sang may napilasan ukon napatay sa bahin sang 61st Infantry Battalion.
Suno kay Pancito, nagahimo sang focused military operation ang mga suldado sa lugar sang naka-engkwentro ang kapin 10 ka NPA members.
Ginpahayag ni Pancito nga nagpalagyo ang mga ginapatihan rebelde nga yara sa idalom sang Sibat Platoon, Southern Front Committee kag nakuha sa encounter site ang pila kagamitan.
Padayon sa subong ang hot pursuit operation agud nga madakpan ang ginabanta 10 ka rebelde.
