Wala na sang kabuhi sang masapwan ang 45-anyos nga lalaki sa irigasyon sang Brgy. Santo Niño, San Miguel, Iloilo.
Sa interview sang Bombo Radyo kay Police Senior Master Sergeant Billy Salvilla, imbestigador sang San Miguel Municipal Police Station, iya ginpahayag nga pagkatapos mag-inom-inom ang biktima kaupod ang iya nga abyan sa ila nga puluy-an sa San Jose sa amo man nga banwa, nagpadulong pa gid ini sa tyangge agud mag-inom kag wala na ini makapauli.
Base sa imbestigasyon sang kapulisan, nagtabok ini sa irigasyon nga may isa ka tapak ang distansya apang natumba ini kag naigo ang sag-ang sa semento rason nga nadagdag sa irigasyon nga ginabulubanta tubtob sa tuhod ang kadalumon sang tubig.
Aga na sang nakita ang lawas sang biktima.
Wala naman sang plano ang pamilya nga ipaidalom sa autopsy ang bangkay sang biktima bangud nagapati ini nga wala sang foul play nga natabo sa kamatayon sang ila himata.
(Article: Phauline Pillora)
