Hustisya, ginasinggitan sang pamilya sang lalaki nga nasal-an kag napatay sang mga operatiba sang ICPO

ILOILO CITY- Nagasinggitan sang hustisya ang pamilya sang lalaki nga nasal-an nga subject sa buybust operation kag napatay sang mga operatiba sang Iloilo City Police Office (ICPO).

Natabo ang insidente sa North Baluarte Molo, Iloilo City kon sa diin ang biktima amo si Karl Daniel Bolante, 27, residente sang amo nga lugar, samtang ang matuod nga subject amo si Dave Mendoza, 23 ,residente sang Rizal Pala-Pala 2, Iloilo City Proper.

Sa interview sang Bombo Radyo kay Amalia Bolante, iloy sang napatay kag isa man ka Barangay Kagawad sa North Baluarte, Molo, Iloilo City, iya ginpahayag nga wala gid sang kamatuoran ang pahayag sang kapulisan nga konektado ang iya anak sa subject nga si Mendoza kag bisan sin-o sa iya pamilya ang wala man nakakilala diri.

Suno sa iloy, indi man mahimo magbutig ang footage sa Closed Circuit Television (CCTV) sa diin makit-an nga gulpi lang nga nagsulod sa lugar ang subject kon sa diin yara man si Bolante nga nagalakat-lakat kag siya ang nasal-an sang mga pulis kag natiruhan tubtob nga napatay.

Pahayag pa sang kagawad, indi man matuod ang pahayag sang pulis tuhoy sa narekober nga armas kag granada sa iya anak bangud makit-an man sa CCTV nga cellphone lang ang ginauyatan sini kag imposible nga makadala ini sang nasambit nga mga butang bangud boxer short lang ang suksok sang iya anak.

Ginahingyo naman sang iloy nga kuntani indi pagkapan-kapanon sang pulis ang insidente kag indi maghimo-himo sang istorya para lang nga mapamatud-an nga konektado ang biktima sa subject nga si Mendoza nga natigayon nga madakpan sang otoridad.

Istoryahan pa sang pamilya kon magapasaka sila sang kaso bangud sa kamatayon sang biktima nga nasal-an lang kag napatay sang otoridad.

Samtang, sa bahin sang PNP, ginpahayag ni Police Capt. Shella Mae Sangrines, spokesperson sang ICPO, nga nagagwa sa ila imbestigasyon nga konektado gid man si Bolante kay Mendoza.

Ginpahayag ni Sangrines nga nag-obstruct pa sa otoridad si Bolante.

Dugang pa niya, magluwas kay Bolante, ginapahayag nga may iban pa nga kaupdanan si Mendoza sa nasambit nga lugar.