Ginapabaskog sang Iloilo City Anti-Smoking Task Force ukon ICAST ang pagpapatuman sang anti-smoking ordinance sa syudad.

Sa interview sang Bombo Radyo kay ICAST Executive Director Iñigo D. Garingalao, iya ginpahayag nga apat ka team ang adlaw-adlaw nga nagalibot agud nga magmonitor sa nagakalain-lain nga lugar sa syudad agud madakpan ang nagalapas sini.

Nalakip sa ila nga nadakpan sang damlag lang ang isa ka tricycle driver sa Fast Craft Terminal sa Barangay Progreso, Lapuz, Iloilo City.

Ginsita sang ICAST ang driver bangud sa paglapas sini sang ordinansa.

Nag-untat pa ini kag nagpangayo sang pasaylo apang gilayon nga nagpalagyo sang gintagaan sang citation ticket.

Apang, gilayon ini nga nasundan kag nadakop sa joint operation sang ICAST kag Philippine National Police.

Nahibaluan nga suno kay Garingalao, may yara sang mga penalty ukon multa nga atubangon ang isa ka indibidwal nga makalapas sa anti-smoking ordinance.

  • Sa first offense, P1,500 nga multa ukon tatlo ka adlaw nga imprisonment;
  • Sa second offense, P2,000 nga multa ukon lima ka adlaw nga imprisonment kag
  • Sa third offense, P5,000 nga multa ukon 10 ka adlaw nga imprisonment.

Paandam pa ni Garingalao may posibilidad man nga mapasakaan sang kaso ang indibidwal nga naglapas sang ordinansa kun indi ma-settle ang gindagdag sa iya nga multa.