Nagpaguwa ang International Criminal Court (ICC) sang arrest warrant batok kay Russian President Vladimir Putin bangud gin-alegar nga responsable ini sa war crimes sa Ukraine.
Gin-isyu sang Hague-based court ang warrant bangud sa ginpahayag involvement ni Putin sa “unlawful deportation” sang Ukrainian children sa Russia.
“There are reasonable grounds to believe that Mr Putin bears individual criminal responsibility for the aforementioned crimes,” suno sa ICC.
May kaangay man nga warrant nga ginpaguwa agud arestuhon si Maria Alekseyevna Lvova-Belova, ang commissioner para sa children’s rights sa opisina sang Russian president bangud sa kaangay man nga alegasyon.
Suno kay Piotr Hofmanski, president sang ICC, apisar sang ginpaguwa sang judges nga warrant, naka-depende gihapon sa international community ang pagpatuman sini bangud wala man sang kaugalingon nga police force ang ICC agud mag-enforce sang warrants.
“The ICC is doing its part of work as a court of law. The judges issued arrest warrants. The execution depends on international cooperation,” suno kay Hofmanski.
Ini nga warrant ang kasunod sang report sang UN-backed inquiry nga nagatumod sa pagpwersa sang Russia agud masaylo kag ma-deport ang kabataan halin sa Ukraine padulong sa areas nga kontrolado na sang Moscow. Kun basehan ang Kyiv, nagdangat sa 16,221 ka Ukrainian children ang gin-deport sa Russia as of last month. Indi ma-verify sang mga imbestigador ini nga numero apang may ginpatpat nga mga indikasyon nga ginpangsaylo na sang Russia ini nga mga bata sa institutions kag foster homes kag ginpanghatagan man sila sang Russian citizenship.
Wala pa sang komento ang Kremlin sa amo nga desisyon sang ICC.
Una na nga nagpanginwala ang Russia nga may atrocities ini nga ginahimo sa Ukraine sa sulod sang masobra isa ka tuig nga invasion.
Wala man ginakilala sang Moscow ang hurisdiksyon sang ICC, isa ka posisyon nga gin-reaffirm ni Kremlin spokesman Dmitry Peskov sini lang nga semana.
Mangin ang Ukraine ang indi man myembro sang amo nga court, apang nag-grant ini sang ICC sang jurisdiction sa amo nga pungsod. Apat ka beses naman nga nagbisita si ICC prosecutor Karim Khan sa Ukraine halin sang ginbuksan ang amo nga imbestigasyon. ##
