Padayunon subong nga adlaw, Agusto 10 ang ika-anom nga semana ukon ang ika-14 nga adlaw sang impeachment trial batok kay Vice President Sara Duterte.
Ini ang ginkumpirma man ni Senate President Sherwin Gatchalian, apisar nga padayun nga maeksperyensyahan ang mamunog nga ulan nga dala sang habagat nga nagatuga man sang pagbaha sa pila area sang Luzon.
Ginalauman nga dayunon sang witness nga si state auditor Xylene Del Campo sa audit trail sang Office of the Vice President kag Department of Education ang paghatag sang iya nahibaluan kaangot sa paggamit sang P612.5 milyon nga confidential funds.
Suno kay House prosecution spokesperson Atty. Benjamin “Jay” Tolosa Jr., pagasabton ni Del Campo ang mga pamangkot nahanungod sa mga natabo sa audit, dala na diri ang notice of disallowance.
Sa matandaan nga nauna na nga nagtestigo si anay state auditor Roderick Wamil nahanungod sa mga audit stage kag dokumento nga personal sini nga gin-uyatan.
Ginlimitahan man sini ang iya nga testimoniya sa mga natabo bag-o ini naghalin sa Commission on Audit (COA).
Pahayag pa ni Tolosa, ginalauman nga magahatag si Del Campo sang kaugalingon sini nga testinmoniya nahanungod sa mga tikang kag record sang COA sa pagpadayon sang audit sa confidential funds sang bise presidente.
Magasugod ang ika-14 nga adlaw sang impeachment trial batok sa bise president alas-10 subong nga aga.
