MIAGAO, ILOILO – Ginkumpirma ni Miagao Iloilo Mayor Macario Napulan nga nagikan sa iya banwa ang ika-16 nga kaso sang Coronavirus Disease 2019 sa probinsya sang Iloilo.
Sa interview sang Bombo Radyo kay Mayor Napulan, iya ginpahayag nga ang COVID-19 positive amo ang apo sang 94 anyos nga lalaki nga nangin positibo man sa nasambit nga balatian.
Ang panibag-o nga kaso amo ang ika-tatlo nga COVID-19 positive sa banwa sang Miag-ao, 22 anyos ang pang edaron.
Nahibaluan nga una nga narekord sa Miag-ao amo ang 22 anyos nga babaye nga subong naga recover na kag ang ika-duha ang 94 anyos nga lalaki nga ginbawian sang kabuhi.
Ginakatingalahan lang sang alkalde bangud Abril 8 pa sang gin swab test ang 22 anyos nga lalaki kag kahapon Abril 15 lang niya nahibaluan nga positibo ini sa COVID-19 nga sa pagkamatuod Abril 10 pa nagguwa ang resulta sang swab test sang nasambit nga pasyente.
Kuntani suno kay Napulan, ginpahibalo siya gilayon sang Department of Health agud nangin madasig ang lihok sang Local Government Unit sa contact tracing.
Dugang pa sang natungdan, ginahulat pa niya ang iban pa nga resulta sang test sang 6 ka mga myembro sang pamilya sang lalaki.
