“Ginuo, amo bala ini ang gusto mo sa akon?”
Pila ka beses nga ginpamangkot ni Aura Landar ang Ginuo bangud sang asud-asud nga mga pagtilaw sa kabuhi nga nagtakos sang iya pagtuo.
Sa iya repleksyon sa Siete Palabras sa Jaro Metropolitan Cathedral subong nga hapon, nagsentro ang testimoniya ni Landar sang St. William Parish sa Passi City sa ikaapat nga pulong: “Dios ko, Dios ko, ngaa bala ginpatumbayaan mo ako?”
Panugiron sini, baliskad sa opinyon nga ang nagaserbisyo sa simbahan, indi malingkang, wala ginakapoy, kag puno sang determinasyon, puno sang mga masakit nga hitabo ang iya inagyan.
Sang 2010, napatay ang iya anak nga naga-edad sadto sang nueve anyos bangud sa dengue.
“Ginuo, ano bala ang sala ko ngaa ginbawi mo siya sa akon? Wala pa gani ako maayawi sa iya,” pamangkot sini sa Ginuo bangud sa sobra nga kasakit sa pagtaliwan sang anak sa lamharon nga edad.
Wala pa diri nag-untat ang pagtilaw.
Sang 2021, may pagpanghangkat sa iya nga ikaayong-lawas. Inadlaw matapos nahibaluan ang iya balatian, naaresto ang iya bana bangud sa kaso nga murder. Duha ka semana ang nagligad, napatay ang iya Nanay Auring nga amo ang nag-giya sang iya pagtuo, ang iya “idol” nga amo ang nagtulod sa iya sa pagserbisyo sa simbahan.
“Sa sulod sang isa ka bulan, pamatyag ko gintakluban ako sang langit,” suno pa kay Landar.
May mga tion suno sa iya nga nagapungko siya kag ginakwestyon ang Ginuo kun ano gid bala ang pagbuot para sa iya.
Sa ikaduha nga bahin sang iya repleksyon, ginsugid naman ni Landar ang mga pagtilaw kadungan sang iya nga pagserbisyo sa simbahan.
“May mga gab-i nga ginaprangka ko si Lord, ‘Ginuo, gusto ko pa magserbisyo, pero ngaa pamatyag ko, nagapalayo na ako sa Simbahan? Ngaa nga naga-isahanon na lang ako? Buhi pa bala ang akon pagtuo sa Imo? Ginuo, ginapatumbayaan mo bala ako?”
Sa pihak sini tanan suno kay Landar, diri nga mga pagtilaw kag mas nahangpan niya sang mas madalom ang paghilibion ni Hesus sang ginlansang siya sa Krus.
“It was not a loss of faith, but a cry from a wounded heart. Wala ako nadulaan sang pagtuo, kundi isa ini ka paghilibion sang napilasan nga tagipusuon. Nagahigugma, nagatuo, kag nagaserbisyo,” dugang niya.
Nagpadayon siya sa pagpangalagad sa Simbahan, ilabi na sa bulig sang mga nagapamati kag naga-upod sa iya nga wala nagahusgar, kag naga-upod sa iya sa tion sang kahuyang.
“Ang panahon sang kabudlay wala nag-guba sang akon pagtuo, kundi ginpapuraw sini ang akon misyon.” dugang niya. “Nagapadayon ako sa pagserbisyo tungod sa Diyos, tungod may mga kalag nga nagakinahanglan nga giyahan. Kag sa akon pagpanglakaton, gina-updan ako sang Diyos sa bokasyon nga akon ginpili.”
Sa iya padayon nga pagpanglakaton kag sa pag-balikid sini sa mga natabo sa iya kabuhi, sarang gid mahambal ni Landar nga tudok sa iya tagipusuon nga: “Ang pagserbisyo sa simbahan isa ka pagbalik sa Diyos sa tanan nga grasya kag bugay nga iya ginhatag sa akon. Isa gid ang klaro sa akon subong. Wala ako ginpatumbayaaan sang Diyos. Amen.”
