Padayunon karon alas dos sa hapon ang ika-pito nga adlaw sang impeachment trial batok kay Vice President Sara Duterte.
Ginapaabot nga magahatag sang iya testimoniya si National Bureau of Investigation (NBI) Director Melvin Matibag sa impeachment court may kaangtanan sa imbestigasyon sang ahensya sa gina-alegar pagpamahog ni Vice President Sara Duterte batok kay President Ferdinand “Bongbong” Marcos Jr.
Suno kay Atty. Benjamin Tolosa sang prosecution panel, magahatag si Matibag sang sabat sa mga pamangkot nga wala natagaan sang klaro nga sabat sang nauna nga mga witness ilabi na ang imbestigasyon sang NBI nahanungod sa pahayag sang Bise Presidente nga may ginkontrata na ini nga tawo agud ipapatay sanday Marcos.
Pahayag pa ni Tolosa nga gamiton sang prosekusyon bilang ebidensya ang kaugalingon nga mga pahayag ni Duterte.
Ginlaragway naman sini ini bilang “admission against interest,” ukon isa ka pahayag nga nagahalin mismo sa bise presidente.
Suno pa sa prosekusyon, ang mga pahayag ni Duterte makasuporta sa akusasyon sa impeachment nga may kaangtanan sa ginatawag nga grave threats batok sa first couple kag sa anay House Speaker Martin Romualdez.
Nagpasalig naman ang prosecution panel nga magapabilin nga nakatutok ang impeachment trial sa mga isyu nga may kaangtanan sa kaso batok sa Bise Presidente.
Ini kaangot sa pagbukas naman sang isyu nahanungod sa pag-host sang Pilipinas sang 2019 Southeast Asian Games kun sa diin si Senator Alan Peter Cayetano ang nangin chairman sang Organizing Committee.
Ginalauman nga mangin importante nga bahin sang trial ang testimonya ni Matibag samtang gina-imbestigaran sang Senado ang mga alegasyon batok kay Vice President Sara Duterte.
Bantayan ang live coverage sang Bombo Radyo Philippines sa ikapito nga adlaw sang impeachment trial.
