Nagmando na si Iloilo City Mayor Raisa Treñas sa Office of the City Administrator nga i-proseso ang ikaduha nga tranche sang fuel subsidy para sa mga public utility jeepney (PUJ) drivers kag operators kasunod sang panibag-o naman nga pagsaka sang presyo sang produktong petrolyo, ilabi na ang diesel.
Sa interview sang Bombo Radyo Iloilo Ms. Joy Fantilaga-Gorzal, spokesperson sang Office of the City Mayor, ginpahayag sini nga unahon anay ang mga PUJ drivers kag operators bangud pila na ka bulan ang nagligad halin sang nabaton nila ang una nga tranche sang ayuda.
Samtang, ang mga tricycle drivers ang nakabaton na sang ika-duha nga tranche sang fuel subsidy, kag ang mga taxi drivers naman ang nakabaton na sang ila una nga tranche.
Suno pa kay Fantilaga-Gorzal, maga-coordinate ang city government sa mga transport cooperatives agud mapadasig ang pagproseso kag pag-release sang subsidy.
Dugang pa sini nga kaangay sang nagligad nga implementasyon, paagi sa subsidy coupons ang paghatag sang ayuda.
Target sang Iloilo City Government nga gilayon mahatag ang fuel subsidy bangud ginapaabot naman ang panibag-o nga oil price hike sa masunod nga semana.
