SAN JOAQUIN, ILOILO – Nakalab-ot na kay Department of the Interior and Local Government Secretary Eduardo Año ang reklamo tuhoy sa ginapahayag pagsinggit kag pagpamuyayaw ni 1st District Board Member Marcelo Valentine Serag kay Police Lieutenant Randy Lambungan, Officer-in-Charge sang San Joaquin Municipal Police Station.
Santo sa reklamo, 6:00 sang hapon Marso 31 sang matabo ang pagbinaisay matapos ang pag pull-ot sang chekpoint sa Brgy. Toog, San Joaquin, Iloilo sa mandu ni Iloilo Police Provincial Office Director Police Col. Kenneth Lucas nga ginka-akig naman ni Serag.
Gin-alegar ni Lambungan nga tuyo pa niya kun tani niya magpaathag kay Serag paagi sa tawag apang gintakpan siya sang telepono kun sa diin saksi mismo ang mga kaupdanan niya nga mga pulis.
Bisan ang Philippine National Police ang nakibot man sa desisyon sang Municipal Disaster Risk Reduction Management Council kag Municipal Health Office nga pag pull-out sang checkpoint.
Ginpahayag ni naman ni Police Brigadier General Rene Pamuspusan, Director sang Police Regional Office, nga indi maayo ang ginhimu ni Serag batok kay Lambungan.
Ginakabig naman ni Pamuspusan nga “misconduct and conduct unbecoming” bilang isa ka elected official ang ginhimu ni Serag.
Sa pagpaathag naman ni Police Regional Office 6 Spokesperson Police Lt. Col. Joem Malong, ang Department of the Interior and Local Government na ang may katungdanan sa paghatag sang disciplinary action sa elected government official.
Suno kay Malong, ginkakas ang checkpoint sa Brgy. Toog sa San Joaquin bangud nga santo sa guidelines, indi sakop ang mga national highway.
Ginpahayag ni Malong nga kun may yara sang reklamo ang elected government official batok sa pulis, mahimo ini nga ipalab-ot sa Provincial Director ukon sa Regional Director kag indi na kinahanglan nga maglab-ot sa pagbayluhanay sang malain nga tinaga.
Ang ginhimo ni Serag suno kay Malong ang may negatibo nga epekto sa morale sang mga pulis.
Sa patas nga pagwaragwag, gintinguhaan sang Bombo News Team nga makuhaan sang sabat si Serag apang nagpamalibad ang opisyal nga maghatag sang pahayag.
