ILOILO CITY- Liwat nga nagpahanumdom ang Commission on Elections sa publiko nga kutob na lang sa Septyembre 30 ang registration para sa May 12,2025 national and local elections.
Sa interview sang Bombo Radyo kay Mr. Jonathan Sayno, Election Assistant II sang Iloilo City COMELEC, iya ginpahayag nga padayon ang registration nga ginahiwat sa dalagko nga mga mall subong nga Septyembre.
Yari ang schedule:
*Septyembre 2 tubtob 7- Robinson’s Place Iloilo Main
*Septyembre 9 tubtob 14 – SM City Iloilo
*Septyembre 16 tubtob 21-Robinson’s Jaro
*Septyembre 23 -28 kag Sepytembre 30-Festive Walk Mall
Gin-athag naman sini nga para lang sa regular voters ang mall registration bangud nagtakop na ang register anywhere program sang COMELEC sang nagligad nga Agosto 31.
Nag-abiso man ini nga wala sang registration kun adlaw sang Domingo.
Suno kay Sayno, pagkatapos sang registration, mangin masako na ang ahensya para sa filing sang Certificate of Candidacy sa una nga semana sang Oktubre.
