Nagsaka ang inflation rate sa Western Visayas sa bulan sang Oktubre sang 0.5 percent kun sa diin halin sa 3.4 percent sang Septyembre, yara na ini sa 3.9 percent.
Ang inflation amo ang rate sang increase sa presyo sa isa ka period.
Base sa Philippine Statistics Authority (PSA)-6, ini bangud sa mas mataas nga presyo sang pagkaon kag non-alcoholic nga mga ilimnon.
Ang index price para sa pagkaon kag non-alcoholic nga mga ilimnon ang nagsaka sang one percent sa 4.3 percent sang Oktubre halin sa 3.3 percent sang Septyembre.
Sa duha ka sunod-sunod nga bulan, ang Aklan ang may lowest inflation rate sang Oktubre nga yara sa 3.1 percent.
Ang Iloilo province ang may pinakamataas nga inflation rate nga yara sa five percent.
Ang Iloilo City may inflation rate nga 4.1 percent; ginasundan sang 3.6 percent sang Capiz kag Guimaras; kag 3.5 percent sa Negros Occidental.
Sa interview sang Bombo Radyo kay Joseph Ladrido, Executive Director sang Institute of Contemporary Economics, iya ginpahayag nga magluwas sa pagtaas sang presyo sang pagkaon kag ilimnon, isa man sa may dako nga kontribusyon sa mataas nga inflation rate amo ang pagtaas sang real property tax partikular sa Iloilo City kag amo man ang presyo sang kuryente.
Suno kay Ladrido, may yara ini sang domino effect bangud nga ang mga nagarenta nga mga negosyante ang nagakapilitan nga magpamahal man sang presyo sang ila serbisyo kag produkto.
Ginapanan-aw man ni Ladrido nga may epekto man sa inflation rate sa masunod nga mga binulan ang pagtaas sang minimum wage nga epekto subong nga tunga-tunga sang Nobyembre.
Sa pihak sini, positibo gihapon ang natungdan nga mangin attractive gihapon sa investors ang syudad bangud sa maayo nga corporate government kag stable man ang local government sang syudad.
Dugang niya, may yara pa man sang tiempo nga maka-recover ang syudad gikan sa epekto sang inflation.
