Magapatigayon ang Iloilo City Health Office sang Measles-Rubella Supplemental Immunization Activity kag Vitamin A distribution halin Agosto 10 tubtob Agosto 28, 2026.
Ini agud mabuligan kag maprotektahan ang mga kabataan batok sa tigdas, rubella kag para man mapabakod ang ila nga resistensya.
Suno kay Mayette Gabanto, Nurse IV kag National Immunization Program Coordinator sang Measles-Rubella Supplemental Immunization Activity, iya ginpahayag nga mas maayo gid nga madala sang mga ginikanan sa pinakamalapit nga district health center ang ila mga kabataan agud mabakunahan kag mahatagan sang Vitamin A.
Mahimo maka-avail ang nagaedad sang 6 tubtob 59 ka bulan nga mga bata.
Pahayag pa sini mahimo man nga makig-coordinate ang mga ginikanan sa mga nurse kag midwife nga assigned sa ila tagsa ka barangay kun sa diin available man ang vaccination sa ila barangay health stations kag amo man sa ila nga mga district health centers.
Dugang pa ni Gabanto, magapatigayon man sang mini kick-off ang City Health Office sa Agosto 10 sa ila talatapan.
Nagapangabay man ang mga ini sa mga ginikanan nga indi gid pag-uyangan ang kaangay sini nga kahigayunan bangud tsansa na ini sang mga kabataan nga nagaedad sang 6 tubtob 59 ka bulan nga maka-avail sang libre nga bakuna.
