ILOILO CITY – Wala sang gahum ang isa ka alkalde nga batakon sa mas istrikto nga quarantine classification ang bug-os nga syudad kun wala pa sang approval halin sa National Inter-Agency Task Force (NIATF).
Ini ang pagpaathag sang Regional Task Force on COVID-19 kun ngaa indi pa mahimo mangin epektibo ang executive order ni Mayor Jerry Treñas nga nagapaidalom sa syudad sang Iloilo sa Modified Enhanced Community Quarantine (MECQ) tubtob sa Mayo 31.
Matandaan nga pila ka oras matapos ginrelease ang EO sang alkalde kahapon sang hapon, gin-anunsyo man nga i-hold lang anay ini ‘pending for approval’.
Sa interview sang Bombo Radyo kay Cindy Ferrer, spokesperson sang RTF, iya ginpahayag nga naendorso na ang amo nga request sa NIATF kag dapat hulaton na lang ang desisyon agud husto ang proseso.
Ang gahum sang local chief executive ang limitado lamang sa pagpatuman sang quarantine classifications sa barangay level kag indi city-wide level suno kay Ferrer.
Sa subong, nagapabilin anay sa Modified General Community Quarantine (MGCQ) ang Iloilo City.
Una na nga ginpahayag ni Treñas nga ang iya MECQ request ang kasunod sang pagsaka sang kaso sang COVID-19 sa syudad kun sa diin reported nga may mga ospital nga wala na nagabaton sang COVID-19 patients.
Ang MECQ amo ang ikaduha sa pinaka-istrikto sang quarantine classification sa Pilipinas.
Kun mapatuman ini nga classification status, mga tawo lang nga may ‘essential’ nga tuyo ukon ulubrahon ang makasulod sa syudad sang Iloilo.
