ILOILO CITY- Ginpasiguro sang Iloilo City Veterinarian Office nga naga- function sa gihapon ang Iloilo City Pound and Animal Shelter para sa mga emergency kag critical cases apisar nga nakatalana ang partial shutdown sang dog pound.
Sa interview sang Bombo Radyo kay Dr. Fernando Abulencia, head sang nasambit nga opisina, iya ginpahayag nga mga critical ukon urgent cases lang ang i- entertain nila, halimbawa kun kinahanglan gid nga i- contain ang ido kaangay sang kaso nga naga-involve sang rabies suspects.
Suno kay Doc Abulencia, ang partial shutdown ang kinahanglan agud masiguro ang safety kag efficiency sang renovation.
Gin-athag man ni Abulencia nga magapadayon ang adoption sang ginrehabilitate nga mga ido bilang kabahin sang commitment sa pagpangita sang pamilya kag puluy-an para sa sini nga mga sapat.
