ILOILO CITY – Daku nga kadula-an para sa probinsya sang Iloilo ang indi pagkalakip sa mga awardee sang Seal of Good Local Governance sang Department of Interior and Local Government subong nga tuig.
Sa interview sang Bombo Radyo kay Iloilo Provincial Administrator Atty. Suzette Mamon, iya ginpahayag nga kun nadala ang probinsya, may ara kun tani sang batunon nga P7 million nga balor sang mga proyekto ilabi na sa imprastruktura.
Magluwas diri suno kay Mamon, ang Seal of Good Local Governance ang isa kun tani sa mga pamaagi agud mapatuman ang dalagku nga mga proyekto gikan sa national government.
Suno kay Mamon, kulang ang requirements sang probinsya sang nagligad nga tuig rason nga wala ini napasa.
Isa sa mga rason amo ang ulihi na nga pag-apruba sang regular budget sang Iloilo sa diin sang Hunyo 2019 na ini napirmahan sa baylo nga Disyembre 2018.
Sa pihak sini, ginpasalig sang natungdan nga ipaidalom sa evaluation kag assessment agud mahibaluan kun ano pa ang dapat himuonagud nga makuha-balik ang record sa masunod nga tuig.
Nahibaluan nga grand slam awardee ang probinsya sang Iloilo sa Seal of Good Local Governance sang tuig 2015 tubtob 2018.
Sa subong nga tuig, ang banwa sang Anilao kag Zarraga sa municipal level kag ang syudad sang Passi sa city level gid lamang ang nakabaton sang nasambit nga pagpasidungog.
