Gin-athag ni Senator Erwin Tulfo nga legal kag nagasandig sa desisyon sang Supreme Court of the Philippines ang ginpatigayon nga reorganisasyon sa Senado kahapon nga adlaw.
Suno pa sa iya nga nakabase ang desissyon sa Avelino vs Cuenco (G.R. No. L-2821) kun sa diin natabo man ang kaangay nga hitabo sang Mayo 5, 2015, kun sa diin dose ka senador ang nagkumpleto sang quorum sa Senado agud makapadayon ang sesyon.
Suno kay anay Senate President Franklin Drilon, apat ka senador nga yara sa gwa sang pungsod sang amo nga tion ang wala gin-upod sa quorum base sa desisyon sang Supreme Court of the Philippines.
Samtang tatlo naman ka senador kaangay ni anay Senator Juan Ponce Enrile, Ramon Bong Revilla Jr., kag Jinggoy Estrada — ang yara sa detention sang amo nga tion.
Dugang pa ni Tulfo, ginhimo ang tikang bangud sang ginatawag nga paglapas sa Konstitusyon matapos nga wala nagapatigayon ang anay myembro sang majority bloc sang session sa sulod na sang tatlo ka sunod-sunod nga adlaw.
Nahibaluan nga bangud sang natabo nga sesyon kahapon nga adlaw, may mga pagbag-o sa liderato sang pila ka mga komite sa Senado.
Lakip na diri ang pag-eliher kay Tulfo bilang bag-o nga chairman sang Senate Blue Ribbon Committee.
May kaangtanan sa imbestigasyon sang komite sa ginapahayag nga mga anomalya sa flood control projects, gin-anunsyo ni Tulfo nga magapatigayon sila sang hearing sa Lunes, Hunyo 8, 2026.
Ini agud nga makapreparar pa ang mga myembro nga maga-upod sa amo nga session.
