Isa ka tawo ang patay kag masobra 60 naman ang pilason matapos maigo sang mga drone strike ang Kuwait International Airport.
Ini sa tunga sang nagalala nga tensyon sa tunga sang United States kag Iran.
Suno sa gobyerno sang Kuwait nga ang pag-atake isa ka “criminal Iranian aggression.”
Gin-ako naman sang Islamic Revolutionary Guard Corps nga sila ang responsable sa operasyon kag ginpahayag nga ini balos sa nagligad nga pag-pang-atake sang Amerika batok sa isa ka Iranian oil tanker kag sa Qeshm Island.
Ang napatay ginkilala nga isa ka Indian national, samtang may pila man ka mga Indian citizens nga napilasan.
Ginahayag man sang U.S. nga may mga Iranian drones kag missiles nga na-intercept sa Kuwait, Bahrain, kag sa mga ruta sang mga civilian ships.
Sa pihak nga bahin, ginpahayag sang Iran nga nagbalos lamang sila batok sa mga base militar sang U.S. sa rehiyon kag gin-akusaran nila ang Kuwait kag Bahrain nga nagbulig sa Amerika.
