Nasapwan ang 41 ka bangkay kahapon nga adlaw, Setyembre 12 sa MV June Aster sa Coron, Palawan.
Ini ang ginkumpirma mismo ni Philippine Coast Guard Incident Commander Commodore Geronimo Tuvilla.
Kasunod ini sang pagkasunog sang nasambit nga barko sang nagligad nga Setyembre 9 kun sa diin 43 lamang sa mga pasahero ang naka-survive.
Lakip man sa mga narekober ang isa ka lungon nga may unod pa nga bangkay.
Base sa record sang PCG, naglab-ot na sa 76 ka bangkay ang natigayon nga marekober sang mga awtoridad, samtang padayun pa ang search operations sa 13 pa ka mga missing.
Nahibaluan nga base sa ticket sang barko, yara sa 134 ang kabilugan nga pasahero sang MV June Aster sang natabo ang insidente.
Padayun naman nga nagakoordinar ang kumpanya sang barko sa pamilya sang mga biktima kag survivors kag magahatag man ini sang burial assistance sa mga nagtaliwan sa nasambit nga trahedya.
