May posibilidad nga magbag-o ang desisyon sang senate impeachment court may kaangtanan sa numero sang boto nga kinahanglanun agud matigayon nga maconvict si Vice President Sara Duterte.
Apang mahimo lamang ini kun kwestyunon sang pulo ukon masobra pa nga senador ang 16 vote-threshold ukon ang ruling sang presiding officer nga si Senator Chiz Escudero.
Ini ang ginkumpirma mismo ni spokesperson of the Senate Impeachment Court Atty. Regie Tongol.
May kaangtanan ini sa pagahiwatun nga botohay sa Setyembre 23 kun sa diin mahibaluan na kun may ara sang mangin pagbag-o sa threshold.
Madumduman nga sang nagligad nga Setyembre 8, naghatag sang manifestation si Senator-Judge Erwin Tulfo kun sa diin nagpangayo ini sang ka-klaruhan ilabi na nga sa 24 ka mga senador, 19 lang sa ila ang makapartisipar kag makahatag sang ila nga boto.
Si Senator Loren Legarda ang yara subong sa luwas sang pungsod bangod sa ginapahayag health concerns matapos ini nga luyag imbestigaran sa plunder kag graft complaints; si Senator Ronald “Bato” dela Rosa nagapanago bangod sa arrest warrant sang International Criminal Court; samtang sanday Senators Jinggoy Estrada kag Rodante Marcoleta ang yara sa presuhan bangod sa separado nga kaso sang plunder.
Suno kay Tongol, indi man magpartisipar sa botohay si Escudero, rason nga 19 lang ka mga senador ang may ara sang gahum nga maghatag sang desisyon kun pila dapat ang numero sang boto agud makakas sa pwesto ang bise presidente.
