Tion na suno kay Ombudsman Jesus Crispin Remulla para sa extradition treaties sang Pilipinas sa mga pungsod sa Europa.
Ini ang pahayag ni Remulla kasunod sang mga reports nga nagapanago sa France si former Ako Bicol party-list Rep. Zaldy Co kag ginpahayag man nga yara sanday Senator Loren Legarda kag ang bata sini nga si Batangas Representative Leandro Leviste nga mga subject para sa plunder investigations sang Ombudsman.
Suno sa iya, ginakonsiderar na nila nga magpadulong sa nasambit nga pungsod ilabi na subong nga daw kaangay nga wala na sang plano si Legarda nga magbalik sa Pilipinas ilabi na nga ginapalawig pa sini ang iya medical leave halin Agosto 2 nga nangin rason kun ngaa wala na ini makapartisipar sa impeachment trial batok kay Vice President Sara Duterte.
Tinutuyo man ni Remulla nga magpadulong sa France agud makipagsapol sa mga international law enforcement agencies sa Europe agud mapalab-ot sini ang concern sang Philippine Government sa mga indibidwal nga nagapangatubang sang kaso sa pungsod.
Nahibaluan nga naka-schedule naman ang byahe sang iya utod nga si Interior Secretary Jonvic Remulla nga magapadulong sa France agud makipagkita sa Interpol officials may kaangtanan man sa nasambit nga mga isyu.
Madumduman nga sang nagpadulong si DILG Sec. Jonvic Remulla sa Iloilo City, nagpromisa ini nga pasabton nila sang iya utod nga si Ombudsman Remulla ang tanan nga may salabton sa layi.
