ILOILO CITY-Ginkilala sang isa ka international award giving body ang isa ka Ilongga nga madinalag-on sa patag sang negosyo.
Ini amo si Alice Ledesma Bautista nga nakabaton sang pagkilala bilang Executive of the Year kag Woman of the Year.
Si Ledesma-Bautista nga tumandok sang Zarraga, Iloilo ang President kag Chief Executive Officer sang isa ka BPO company sa Iloilo City.
Ang naghatag sang award amo ang International Business Awards nga ginakabig nga world’s premier business awards program kag nagaisahanon nga completely-international program nga nagakilala sa achievement sa workplace.
Nahibaluan nga masobra sa 300 ang delegates nga nagtambong sa event kag kapin 3,600 ang nominations gikan sa nagkalain-lain nga kategorya kag ang awarding ceremony ang ginpatigayon sa Istanbul, Turkey.
Siya ang nagaisahanon nga Ilongga nga nalakip sa mga ginhatagan sang pasidungog.
Sa interview sang Bombo Radyo kay Ledesma Bautista, iya ginpahayag nga dako nga dungog ang amo nga award kag pamatuod ini sang ila dedikasyon sa ila negosyo ilabi na nga nagahatag ini sang trabaho sa mga Ilonggo.
Suno kay Alice, ang ila istorya sang kadalag-an ang resulta sang ila kaisog nga magsulod sa negosyo, pagpaninguha nga mapasanyog ini kag pagsalig sa ila ikasarang kag sa abilidad sang ila mga empleyado.
Nag-engganyo man ini sa tanan nga kun may yara sang oportunidad, indi gid ini pagbuy-an kag pangitaan sang paagi agud nga magmadinalag-on ini.
Sa Nobyembre 8 naman, natalana nga magpadulong sa New York City si Bautista agud magbaton sang lima ka awards gikan sa Stevie Awards Women in Business nga ginalakipan sang Company of the Year, Management Team of the Year in a Woman Led Organization, Woman of the Year, Executive of the Year, kag Female Executive of the Year in Asia, New Zealand and Australia.
