ILOILO CITY- Wala ginkumpirma apang wala man ginpanginwala sang isa ka Ilonggo nga abugado nga legal counsel ini ni PSSgt Noel Alabata nga may pending case nga frustrated murder.
Si Alabata nga assigned sa Philippine National Police Drug Enforcement Group sa Western Visayas amo ang ginatudlo gunman sa isa ka attempted assassination sa Negros Oriental nga gin-alegar nga ang utok amo man si suspended Negros Oriental Third District Representative Arnie Teves Jr.
Sa interview sang Bombo Radyo kay Atty. Kaiser Cordero, tumandok sang Dueñas, Iloilo kag Chief Executive Officer kag founding partner sang Cordero Ejercito and Associates law firm, iya ginpahayag nga indi ini otorisado nga magpagwa sang statement kun ano gid ang tul-id nga papel sini sa kaso apang gin-ako niya nga ginpangabay siya nga i-assist si Alabata.
Nagpamalibad man si Atty. Cordero nga hingadlan kun sin-o ang naghingyo sa iya agud mag-assist sa involved nga pulis sa senate inquiry.
Suno kay Cordero,sa pagkamatuod, indi man importante ang presensya sang abugado sa amo nga senate hearing bangud indi man ini prosecutorial,sa baylo, ini ang investigastive in aid of legislation apang suno sa iya, kaangay nga trial judges na ang aktwasyon sang mga senador.
Nahibaluan nga si Alabata ang ginatudlo nga amo ang nagtuyo nga magpatay sa mga negosyante nga sanday Jason Ong kag Sandy Tinguha sa Dumaguete City sang 2021.
