Ginpamatud-an sang isa ka Ilonggo seafarer nga ang pagbulig sa iban nga tawo ang indi kinahanglan nga mahal basta nga sinsero ini nga akto kag hugot sa tagipusuon.
Sa interview sang Bombo Radyo kay Ronaldo Costorio, tumandok sang Concepcion, Iloilo, iya ginpahayag nga naghalin siya sa pigado nga pangabuhi gani nahangpan niya ang balatyagon sang pigado nga kabataan.
Suno kay Costorio, ini ang rason kun ngaa ginlunsar niya ang iya inisyatibo nga “Yapak para sa Pangarap.”
Ginpahayag ni Costorio nga paagi sini nga proyekto niya kun sa diin nagapanghatag siya sang tsinelas sa mga kabataan sa mga pigado nga mga eskwelahan, madamo siya sang mabuligan.
Pahayag niya, gikan sa iya eksperyensiya sang una nga gubaon ang iya tsinelas kun mag-eskwela, mabatyagan sang mga kabataan ang kalipay nga makabaton sang tsinelas nga magamit nila adlaw-adlaw sa pagpadulong sa eskwelahan.
(NINONG RON)
Sa subong, siyam ka bulan pa lamang siya sa barko kag napat-ud niya nga magluwas nga para sa iya kaugalingon, nagabaka-baka siya para sa madamo nga kabataan nga nagakinahanglan sang bulig sa ano man nga pamaagi.
Nahibaluan nga si Costorio ang isa sa buhi nga pamatuod kun ano ka-gamhanan ang Bombo Radyo bangud pinaagi sa panawagan section, nagkitaay sila sang iya amay nga malapit 30 ka tuig niya nga ginpangita.
