Nag-raise sang point of order si Senate President Alan Peter Cayetano kag ginmuno ang pagtaas sang tingog ni Senator Kiko Pangilinan samtang yara sila sa tunga-tunga sang debate sa plenaryo sa Senado.
Natabo ini samtang ginakwestyon ni Pangilinan kun ngaa wala nag-agi sa Committee on Rules ang mosyon ni Sen. Rodante Marcoleta para tugutan nga makatambong kag makaboto ang isa ka senador sa sesyon paagi lamang sa video conference ukon online lamang.
Nag-umpisa si Cayetano sa “I hope we learned our lesson” kag ginbalikan pa sini ang pagpangayo pa gani sang pasaylo ni Pangilinan kay Senator Robin Padilla bangud sang pagtaas man sang iya tingog.
“I hope we learned our lessons. Senator Pangilinan already apologized to Senator Padilla, then now you’re shouting at us. The record will show, naka-tape naman e. Ang taas-taas ng boses niyo e,” dugang ni Cayetano.
Matandaan nga sa isa ka sesyon sang nagligad pa nga sinemana, nagpahayag si Padilla nga maga-file siya sang ethics complaint batok kay Pangilinan bangud sang pagtaas suno sa iya sang tingog sini samtang yara sila sa plenaryo.
Pahayag ni Padilla, wala siya naanad nga ginasinggitan.
Nagtanyag pa si Pangilinan sang pagpangamusta kay Padilla sang amo nga tion apang wala ginbaton ni Padilla bangud gusto sini nga sa plenaryo man mag-sorry si Pangilinan agud mabatian sang tanan.#
