Magasulod na subong nga semana sa audit phase ang impeachment trial batok kay Vice President Sara Duterte matapos mapamatud-an ang pagpagwa kag pag-withdraw sang P612.5 milyon confidential funds sang Office of the Vice President kag Department of Education.
Suno kay Tingog Party-list Rep. Jude Acidre, masunod nga igaatubang nga testigo ang halin sa Commission on Audit (COA).
Ini agud mapaathag kun paano gin-audit ang confidential funds kag kun nagsunod bala sa patakaran ang liquidation amo man ang ginpasa nga supporting documents.
Ginalauman nga ang una nga testigo amo ang anay COA State Auditor nga si Roderick Wamil kag sa subong nga Intelligence and Confidential Funds Audit Office Supervising Auditor Celine May Del Campo.
Sunod naman nga ipaatubang si House Legislative Information Resources Management Department Director Marivic Pareja.
Suno kay Acidre nga halin sa pagbusisi sang pag-withdraw sang pondo, magasaylo na subong ang prosekusyon sa topiko kun paano ini gingastos kag kun insakto bala ini nga na-liquidate.
Sa matandaan nga sang nagligad nga semana, nagtestigo ang duwa ka anay opisyal sang Land Bank nga nagpahayag nga kabilugan nga P612.5 milyon nga confidential funds ang naghalin sa National Treasury kag gin-withdraw sang bilog paagi sa pito ka cheque.
Ginalauman nga pagatalakayon sang mga COA witness ang nangin direktiba sang komisyon nga ibalik ang P73.287 milyon nga confidential funds nga ginpagwa sang OVP sadtong 2022.
Magasugod alas 10 subong nga aga ang ikaonse nga adlaw sa ikalima nga semana sang impeachment trial.
Mabatian kag malantawan ini sa tanan nga digital platforms sang Bombo Radyo Philippines…
