Nagpabutyag sang 100% nga kakumpiyansa ang intelligence chief sang Armed Forces of the Philippines (AFP) nga wala sang destabilization plot sa ila hanay sa tunga sang mga tikang para sa impeachment ni Vice President Sara Duterte.
Ginhimo ni Lieutenant General Ferdinand Barandon, commander sang AFP Intelligence Command, ang assurance sa ginpatigayon nga confirmation hearing sang Commission on Appointments (CA) Committee on National Defense sang ginpamangkot ini ni Batangas Rep. Marvey Mariño kun may yara sang dapat kabalak-an sa sulod sang military sa tunga sang mga ginaduso nga pag- impeach sa vice president.
Suno kay Barandon, magapabilin sila nga mission-focused kag magatuman sa konstitusyon, nga amo man ang una na nga ginpahayag sang Chief of Staff kag mga senior commanders sang AFP.
Gindugang niya nga “professionals kag mission-oriented” ang military officers nga nagasunod sa “chain of command.”
Suno pa kay Barandon, prayoridad nila ang pagbantay sa external interference bangud sa posibilidad nga hingalitan sang iban nga pungsod ang politikal nga sitwasyon subong.
Sang nagligad nga semana, ginsiling man ni AFP Deputy Chief of Staff Lieutenant Gen. Jimmy Larida nga wala sang ano man nga indi maayo nga nagakatabo sa sulod sang AFP sa tunga sang nagainit nga away nanday President Ferdinand “Bongbong” Marcos Jr. kag Duterte.
Kasunod ini ang paghangkat ni former President Rodrigo Duterte, nga amay ni VP Sara,sa military nga protektahan ang konstitusyon gikan sa gintawag niya nga “fractured governance” ni Marcos.
