Gina-imbestigaran sang National Bureau of Investigation (NBI) ang isa ka bag-o nga natukod nga real estate company nga ginatudlo nga may kaangtanan sa associates ni Vice President Sara Duterte.
Ini ang kabahin sang imbestigasyon sa alegasyon sang indi maathag nga ginhalinan sang manggad sang bise presidente kag posible nga indi husto nga pagdeklarar sang iya mga propiedad.
Gintumod ni NBI Director Atty. Melvin Matibag ang Westgate88 Real Estate Development Corporation bilang sentro sang imbestigasyon.
Suno sa iya, bisan bag-o pa lamang ang kompaniya, gin-report nga madamo ini sang land assets.
Suno kay Matibag, natukiban sang mga imbestigador ang involvement sang pila ka abogado sa kompaniya lakip ang isa ka associate sang Duterte-Carpio Law Offices kag ang presidente sang Westgate88.
Suno sa direktor sang NBI, nakita man sang mga imbestigador ang mga koneksiyon sang sini nga mga indibidwal sa mga propiedad nga gin-deklarar ni Duterte sa iya Statement of Assets, Liabilities, and Net Worth ukon SALN.
Nadiskubrehan man sang NBI nga ang isa ka indibidwal nga ginapahayag nga may joint bank account upod kay Mans Carpio nga bana sang bise presidente.
Ginpahayag ni Matibag nga magapadala ang NBI sang subpoena sa mga indibidwal nga nalakip sa imbestigasyon agud mapaathag ang ila tagsa ka papel sa Westgate88 kag matumod ang kadakuon sang ila partisipasyon sa mga aktibidad sang kompanya.
Nagapakig-angot man ang ahensya sa Bureau of Immigration (BI) agud ma-verify ang travel status sang mga indibidwal samtang nagapadayon ang imbestigasyon.
Ini nga latest development ang kasunod sang una nga pag-refer sang NBI sa kaso sa Office of the Ombudsman may kaangtanan sa mga propiedad nga ginatudlo nga indi husto ang pagdeklarar sa SALN ni Duterte.
