Ipatawag sang National Bureau of Investigation (NBI) ang mga host sang “Machong Chismisan” podcast agud imbestigaran ang ila insensitibo kag masakit nga mga pahayag batok kay Josh, ang subang nga anak ni Kris Aquino, nga yara sa autism spectrum.
Mismo si NBI Director Melvin Matibag ang nagkumpirma nga magapatigayon ang ahensya sang imbestigasyon kag magapadala sang subpoena sa mga persona nga nalakip sa insidente.
Nauna na nga ginpahayag ni 1PWD Party-list Representative JD Castro nga magapasaka ang ila grupo sang complaint sa NBI sa Lunes, Oktubre 19, batok sa mga host sang podcast.
Ginhaboy sang mga kritisismo ang lima ka lalaki nga host matapos ang ila episode nga ginpagwa sang Oktubre 5. Gintawag pa sang isa sa ila si Josh nga “walang kwenta.”
Bisan ginkakas na ang nasambit nga episode sa ila social media page, may mga bahin sang video nga gin-repost na sang nagkalain-lain nga netizen sa social media.
Nagpangayo naman sang pasaylo sa publiko ang mga host sini nga Huwebes kag ginbaton ang ila responsibilidad sa ila mga ginhimo kag ginpahayag. Gin-ako man nila nga indi matarong ang ila ginhimo, insensitibo, kag masakit para sa iban.
“We acknowledge that our conduct was inexcusable, deeply insensitive, and hurtful. We recognize the impact of our actions, and we do not wish to make excuses for the harm we have caused,” suno sa statement sang hosts.
Gilayon nga gin-terminate sang Pod Network ang ila kontrata sa amo nga podcast.
Sandig sa Republic Act No. 9442 nga nag-amyendar sa Magna Carta for Disabled Persons ukon Republic Act No. 7277, mahimo masilutan sa idalom sang layi ang pagpangyaguta, diskriminasyon, kag pagpakahuya sa persons with disability (PWD).
Ang mapamatud-an nga nakalapas sa sini nga layi mahimo pamultahon sang P50,000 tubtub P100,000 kag mapreso sang anum ka bulan tubtob duha ka tuig para sa una nga paglapas.
Nahibaluan nga nagpaguwa naman sang ila pagsuporta kay Josh ang celebrities kaangay kanday Michael Leyva, Boy Abunda, Dingdong Dantes, Aiko Melendez, kag iban pa.
