Ginbulgar sang National Bureau of Investigation (NBI) nga isa ka contractor lang ang nakakuha sang flood control projects nga nagabalor sang P7-billion sa una nga distrito sang Davao City halin 2018 tubtob 2024.
Suno kay NBI Director Melvin Matibag, nadiskubrehan sang ahensya ang amo nga kantidad matapos mag-coordinate sila sa Commission on Audit (COA).
Ang inisyal nga impormasyon amo nga P1.9 billion ang balor sang mga kontrata nga na-award sa Genesis88 Construction Inc. nga ginapahayag suod sa Duterte family.
“We also have coordination with the Commission on Audit. Medyo kulang pala yung figure na tinitingnan naming P1.9 [billion] na nakuhang proyekto ng isang contractor,” suno kay Matibag.
Dugang niya, magapagwa ang NBI sang subpoena para sa mga dokumento halin sa COA bilang kabahin sang imbestigasyon.
Nahibaluan nga nag-abot sa headquarters sang NBI subong nga adlaw si Department of Public Works and Highways (DPWH) Region 11 Director Juby Cordon matapos siya ginpatawag sang bureau may kaangtanan sa ginasuspetsuhan nga mga anomaliya sa mga flood control projects sa Davao City.
Nag-turn over man ang regional office sang DPWH sang 10 ka kahon sang mga dokumento sa NBI samtang ginai-imbestigaran ang 51 ka flood control projects sa syudad.
Suno kay Matibag, gin-subpoena sang NBI ang mga rekord sang tanan nga 51 ka proyekto bangud may suspetsa ang mga imbestigador nga may problema sa pila sini.
Ginhatag niya bilang halimbawa ang isa ka proyekto nga, suno sa iya, pareho ang coordinates kag makita ini sang lima ka beses sa mga rekord sang pondo, bisan lain-lain ang titulo sang mga proyekto.
“Fifty-one projects yung tinignan, kaya natin yun sinubpoena dahil may suspicion na may problema dito. Gaya nung specific na may isang proyekto na iisa yung coordinates niya pero limang beses itong pinondohan, na iba-iba lang yung titulo,” suno sa NBI chief.
Matandaan nga sang nagligad nga semana, sang nagsiling si Matibag nga may “red flags” sa pila ka flood control projects sa Davao City 1st District, nagsabat si Rep. Paolo “Pulong” Duterte nga gina-abi-abi nila ang imbestigasyon apang nagpanawagan man ini sa bureau nga dapat patas ini kag wala sang ginapili sa ila pagpangusisa sa alleged irregularities.#
