Ombudsman sa pagpyansa ni Revilla: ‘We will exhaust all remedies’

Himuon sang Office of the Ombudsman ang tanan nga legal nga paagi agud mapamatud-an nga mabaskog gihapon ang “evidence of guilt” batok sa anay senador nga si Ramon “Bong” Revilla Jr. nga ginaalegar naangot sa flood control scandal.

Sa statement nga gin-release subong nga hapon, ginsiling sang Ombudsman nga ginarespeto sini ang desisyon sang Sandiganbayan nga pa-pyansahon si Revilla.

Suno pa sa Ombudsman, nagasalig ini sa resulta sang ila imbestigasyon kag padayon nga depensahan ang merito sang kaso nga ila ginpasaka.

“The Office of the Ombudsman, while it respects the orders and decisions of the Sandiganbayan, must stand by its own investigation and work. We will exhaust all remedies to highlight the basis for which we can say that evidence of guilt is indeed strong against former Senator Ramon “Bong” Revilla,” suno sa statement nga ginpagwa sini lang nga hapon.

Nahibaluan nga nagkadto na ang anay senador sa anti-graft court agud magbayad sang P1-million nga pyansa sa kaso nga malversation. Buot silingon sini, pagkatapos sang proseso sang pila pa ka dokumento, mahilway na siya sa presuhan.

Ang kaso sini nga malversation ang naangot sa maanomaliya nga P92.8-million alleged ghost flood control project sa Pandi, Bulacan.

Suno sa korte, gin-grant ang bail application bangud napaslawan ang prosekusyon nga mag-establisar sang mabakod nga ebidensya nga guilty si Revilla.

Denied naman ang bail application sang iya kaupod nga mga akusado nga mga opisyal sang Department of Public Works and Highways (DPWH) nga sanday Brice Hernandez, Jaypee Mendoza, Arjay Domasig, Emelita Juat, Juanito Mendoza, kag Christina Pineda.

Matandaan nga sang Enero, ginpasaka kanday Revilla ang kaso nga graft kag malversation bangud sang alleged ghost project.

Pending ang kaso nga graft sa 4th Division sang Sandiganbayan samtang yara naman sa third division ang kaso nga malversation.#