Malaka pa lamang ang mga nagabisita sa public cemetery sa Jaro, Iloilo City samtang nagahilapit ang Pista Minatay.
Sa interview sang Bombo Radyo kay John Felix Huertas, maintenance worker sa amo nga patyo, iya ginpahayag nga posible nga bwas pa nga weekend magasugod sa pagdamo ang mga magabisita.
Posible suno kay Huertas nga nakaapekto man ang tyempo bangud sa pag-ulan nga nagtuga sang pagdanaw-danaw.
Nakit-an man sini nga gamay na lang ang naga-request sang service, kag nagamato-mato na lang ang mga tawo sa pagpaninlo sa pantyon sang ila nagtaliwan nga himata.
Dugang niya, sa kinaandan, Oktubre 31 tubtub Nobyembre 1 nagadugok ang mga tawo sa Jaro Public Cemetery, samtang nagahagan-hagan naman sa Nobyembre 2 kag 3.
Nagpangabay man ini sa publiko nga magmato-mato sa pagmintinar sang katinlo sa palibot paagi sa paghimos sang ila mga basura.
